簡介
鬍鬚佬，地球人。貪慕虛榮，好眉好貌生沙虱。
金句
- 世事就係好奇妙嘅，往往唔係嚟得太遲就嚟得太早。今晚哩個獎，一半，係屬於我嘅，一半，係我同人攞嘅。就因爲我可以同佢攞哩半個獎，我覺得我好榮幸。同埋，我永遠都會銘記，就係因爲哩啲嚟得唔遲唔早，咁就成就咗我同埋佢一生喺梨影界嘅事業。多謝。 --白雪仙
- 有啲地方就好似涼茶咁，你唔中意佢，但你需要佢。 --鬍鬚佬
鬼上身亂噏
夕陽無限
好耐之前，喺網上面睇到一個港台嘅節目，叫港式男女，哩面有一集係講到六十歲以上喪偶嘅長者對前人嘅思念，今日再睇一次，同樣感動。裡面有兩位唔同嘅長者，一女一男，講咗一啲說話，我覺得幾有感覺。抄咗出嚟。
七十一歲， 哩個枕頭佢枕過咖，我掉咗自己嗰個就愛哩個囉，愛佢枕過哩個囉。我點解呢咁？我覺得呢，俾佢保護我……哈哈…… 如果我死得，搵得翻我老公嘅，我即刻死呀。 佢諗得幾周到呀，我老公諗咖，曬埋一對相到時第日是但邊個死先都有個相吖，唔使哩咁he吖嘛。同埋嗰日影咖，但係唔同埋嗰日死啫。哈哈…… 有時睇電視覺得怪呀，笑，同邊個笑啫？喊，又同邊個喊呢咁樣？
六十五歲，
佢唔喺度嘅時候呢，每當我翻到屋企開門嘅時候，我個心都覺得佢仲坐喺個沙發度等我翻嚟。
以前我有咁講過，如果係後生嘅時候呢，我就希望你去先喇。因爲點解呢？咁啲仔女可以等我嚟照顧。如果年紀大咗呢，我就寧願走嗰個係我。因爲到時仔女可以照顧你啦，唔須要我照顧喇。好可惜而家就剛剛相反。
我諗，終有一日，我哋或者都會著住件好靚嘅舞衣，單人獨舞。只不過，又係咪燦爛如昔呢？